होटल पौवाले आफ्नो स्थापनाको १० औं वर्ष प्रवेशको सुखद अवसरमा आयोजना गरेको तीन दिने ‘स्वाद उत्सव’ कार्यक्रम पाल्पामा भव्य रूपमा सम्पन्न भएको छ । होटलले आफ्नो वार्षिकोत्सवलाई ग्राहकहरूसँग खुसी साटासाट गर्दै मनाउने उद्देश्यले आयोजना गरेको यस उत्सवमा पाल्पा शाखामा मात्रै १ हजार ५ सय भन्दा बढीले होटलले पस्केको विशेष स्वादको अनुभव गरेका छन् ।
होटल पौवा पाल्पा शाखाका प्रबन्धक यदु प्रसाद भट्टराईले संस्थाको १० औं स्थापना दिवसको अवसरमा देशैभरका शाखाहरूमा एकैसाथ स्वाद उत्सव कार्यक्रम सञ्चालन गरिएको जानकारी दिनुभयो । उहाँका अनुसार यो उत्सव पौवाको १० वर्षको सफल यात्रामा साथ दिने ग्राहकहरूप्रति आभार प्रकट गर्ने एउटा माध्यम पनि हो । पौवाका देशभर रहेका अन्य शाखाहरूमा पनि यस्तै उत्साहजनक सहभागिताका साथ स्वाद उत्सव मनाइएको छ ।
होटल पौवाले केवल व्यावसायिक सेवा मात्र नभई नेपाली मौलिकता र सांस्कृतिक परम्परालाई पनि जोगाउने प्रयास गर्दै आएको छ । पौवा पाल्पाकी लेखा शाखा प्रमुख सञ्जु कार्कीले होटलले विभिन्न नेपाली चाडपर्वहरूमा आफ्ना ग्राहकहरूलाई विभिन्न मौलिक र रैथाने परिकारहरू निःशुल्क रूपमा चखाउँदै आएको बताउनुभयो । सोही परम्परालाई निरन्तरता दिँदै यसपटक पनि स्थापना दिवसको अवसरमा तीन दिनसम्म विशेष परिकार पस्किएको उहाँले जानकारी दिनुभयो ।
तीन दिनसम्म चलेको यस स्वाद उत्सवमा होटलले हरेक दिन एउटा शाकाहारी र एउटा मांसाहारी गरी दुई प्रकारका विशेष परिकारहरू ग्राहकलाई चखाएको थियो । उत्सवको पहिलो दिन बनाना चिल्ली र फिस तावा पस्किएको थियो भने दोस्रो दिन पुदिना चिकन र भेज नवाबि कवाफको स्वाद लिनेको भिड लागेको थियो । उत्सवको अन्तिम तथा तेस्रो दिन बटर चिकन र क्रिस्पी मस्रुम चखाउँदै होटलले कार्यक्रमको समापन गरेको हो ।
दश वर्ष अघिदेखि सेवा सुरु गरेको होटल पौवाले छोटो समयमै नेपालको होटल क्षेत्रमा आफ्नो दरिलो उपस्थिति जनाएको छ । पाल्पा आएका आन्तरिक तथा बाह्य पर्यटक र स्थानीय बासिन्दाले होटलको यस प्रकारको रचनात्मक कार्य र उत्कृष्ट स्वादको खुलेर प्रशंसा गरेका छन् । यस उत्सवले नेपाली स्वाद र आतिथ्यलाई थप उचाइमा पु¥याउने विश्वास होटल व्यवस्थापनले लिएको छ ।
सम्बन्धित खवर
