पाल्पा, फागुन १६ पाल्पा क्षेत्र नं. १ बाट नेकपा एमालेका प्रतिनिधिसभा सदस्यका उम्मेदवार नारायण प्रसाद आचार्यलाई पितृशोक परेको छ । उहाँका पिता दिल्ली प्रसाद आचार्यको ९२ वर्षको उमेरमा निधन भएको पारिवारिक स्रोतले पुष्टि गरेको छ ।
स्वर्गीय आचार्यको जन्म १९९० कार्तिक २६ भएको थियो । उहाँका ५ छोरा र ३ छोरी हुनुहुन्छ । उहाँको निधनले परिवार र स्थानीय समुदायमा गहिरो चोट पुगेको छ । पारिवारिक स्रोतका अनुसार स्वर्गीय आचार्यको अन्तिम संस्कार पाल्पा र स्याङ्जाको सिमानामा पर्ने धार्मिक स्थल राम्दीमा हिन्दु परम्परा अनुसार गरिने तयारी गरिएको छ ।
चुनावी सरगर्मीका बीच दुखद घटना
निर्वाचनको सरगर्मी बढिरहेका बेला उम्मेदवार आचार्यलाई परेको यो पारिवारिक बज्रपातले एमाले वृत्त र पाल्पाको राजनीतिक माहोललाई स्तब्ध बनाएको छ । हाल निर्वाचन क्षेत्रमा चुनावी प्रचारप्रसार र घरदैलो कार्यक्रममा व्यस्त रहनुभएका आचार्य पिताको निधनपछि शोकमा डुब्नुभएको छ ।
राजनीतिक पृष्ठभूमि
नारायण प्रसाद आचार्य पाल्पा निर्वाचन क्षेत्र नं. १ बाट दोस्रो पटक प्रतिनिधिसभा सदस्यका लागि चुनावी मैदानमा होमिनुभएको हो । यसअघि सम्पन्न निर्वाचनमा सोही क्षेत्रबाट भारी मतका साथ निर्वाचित हुनुभएका आचार्य यसपटक पनि आफ्नो विरासत जोगाउने दाउमा हुनुहुन्छ । आफ्नो कार्यकालमा गरेका विकास निर्माणका काम र संगठनमा बलियो पकड भएकै कारण उहाँलाई एमालेले पुनः विश्वास गरेर टिकट दिएको थियो ।
चुनावी अभियान प्रभावित
स्थानीय नेता तथा कार्यकर्ताहरूले स्वर्गीय दिल्ली प्रसाद आचार्यप्रति भावपूर्ण श्रद्धाञ्जली अर्पण गर्दै उम्मेदवार आचार्य र शोक सन्तप्त परिवारजनमा गहिरो समवेदना प्रकट गरिरहेका छन् । बुवाको अन्तिम संस्कार र किरियाका कारण केही दिन उहाँको चुनावी अभियान प्रभावित हुन सक्ने देखिएको छ ।
सम्बन्धित खवर
