पाल्पा – माथागढी गाउँपालिकाभित्रका १९ विद्यालयहरूका लागि विद्यालय सुधार योजना निर्माण सम्बन्धी कार्यशाला गरिएको छ ।
विद्यालयको शैक्षिक तथा भौतिक अवस्था सुधार गर्न आवश्यक अल्पकालिन र दीर्घकालिन योजना निर्माणमा सहयोग पु–याउने उद्देश्यले कार्यशाला गरिएको हो । कार्यशालाको उद्घाटन गर्नुहुँदै माथागढी गाउँपालिकाका अध्यक्ष यमबहादुर चिदीले विगतका वर्षमा बनाएको विद्यालय सुधार योजनाको समीक्षा गर्दै नयाँ योजना निर्माण र कार्यान्वयनमा कार्यशालाले सहयोग गर्ने विस्वास गर्नुभयो ।
कार्यक्रममा पालिकाका निमिक्त प्रमुख प्रशासकीय अधिकृत नित्यानन्द खनाल, माथागढी गाउँपालिका वडा नं ३ का अध्यक्ष तेजबहादुर घर्तीमगर, नेपाल पत्रकार महासङ्घ पाल्पाका अध्यक्ष रेखीराम रानालगायतले धारणा राख्नुभयो । कार्यशाला उद्घाटन कार्यक्रम सामाजिक विकास समितिका संयोजक एवं वडा नं. १ का अध्यक्ष राजकुमार पन्थीको अध्यक्षता, शिक्षा शाखा प्रमुख प्रेम बाह्रघरेको स्वागत र दिव्यज्योति माविका प्रअ लोकेन्द्र थापाको संचालनमा भएको थियो ।
कार्यशालामा पालिकाभित्रका १९ वटा विद्यालयका विव्यस अध्यक्ष, अभिभावक र प्रअहरूको सहभागिता रहेको छ ।
