पाल्पा । चन्द्रदेवी प्राथमिक विद्यालयको वार्षिकोत्सव सम्पन्न भएको छ । माथागढी ८ बहादुरपुरको विद्यालयको २६ औं वार्षिकोत्सव तथा अभिभावक दिवस सम्पन्न भएको हो ।
कार्यक्रमका प्रमुख अतिथि माथागढी गाउँपालिका अध्यक्ष यम बहादुर चिदीले सामुदायिक विद्यालयहरुको गुणस्तर बढाउन गाउँपालिकाले प्राथमिकताका साथ योजना बनाएर लागेको बताउनुभयो । अध्यक्ष चिदीले विद्यार्थीहरुको संख्या बढाउने भन्दा भएको संख्यालाई गुणस्तरिय शिक्षा दिन लाग्नुपर्ने बताउनुभयो ।
कार्यक्रमका विशिष्ट अतिथि वडा नं. ८ का वडाध्यक्ष दिल बहादुर ढेंगाले खानी क्षेत्रमा विद्यालय भएकाले त्यसको प्रभाव परेको बताउनुभयो । वडाध्यक्ष ढेंगाले सडक नजिकै विद्यालय भएकाले टिप्परको आवाज र धुलोले विद्यार्थीको पठनपाठनमा समस्या भएको बताउनुभयो ।
वार्षिकोत्सवका अवसरमा प्रधानाध्यापक ज्ञान बहादुर पुलामीले विद्यालयको आर्थिक तथा वार्षिक प्रतिवेदन पेश गर्नुभयो । प्रधानाध्यापक पुलामीले विद्यालयको भौतिक तथा शैक्षिक अवस्थाको बारेमा जानकारी समेत गराउनुभयो ।
विद्यालय व्यवस्थापन समितिका अध्यक्ष समन बहादुर लाम्काहाले स्थानीय सरकारले विद्यालयको भौतिक तथा शैक्षिक सुधारका लागि आवश्यक ध्यान दिनुपर्ने बताउनुभयो । अध्यक्ष लाम्काहाले ग्रामिण क्षेत्रका सामुदायिक विद्यालयहरुमा बसाईसराईका कारण विद्यार्थीको संख्या पनि कम हुँदै गएकाले समस्या थपिँदै गएको बताउनुभयो ।
कार्यक्रममा विद्यालयका विभिन्न अतिरिक्त क्रियाकलापमा उत्कृष्ट हुने विद्यार्थीहरुलाई पुरस्कार समेत वितरण गरिएको थियो । २०५६ सालमा स्थापित यस विद्यालयमा ३२ जना विद्यार्थीहरु अध्ययनरत रहेका छन् ।
