विजयकुमार बौडेल –
११ चैत्र – पाल्पाको तिनाउ गाउँपालिकामा लागु औषध सहित दुई यूवा पक्राउ परेका छन् । तिनाउ गाउँपालिका वडा नं. ३ झुम्सास्थित सिद्धार्थ राजमार्गमा प्रहरीले चेकिङ गर्ने क्रममा उनीहरु लागुऔषधसहित पक्राउ परेका हुन् ।
प्रहरी चौकी दोभानको टोलीले शंका लागि बुटवल देखी पोखरा जाँदै गरेको ग ३ च ५९०१ नम्बरको कार चेकजाँच गर्दा उनीहरु लागुऔषध सहित फेला परेका थिए । पक्राउ पर्नेहरुमा कार चालक कास्की जिल्ला अन्नपुर्ण गाउँपालिका वडा नं. ५ बिरेठाँटीका ३५ बर्षिय संजय मुल्मी (नेवार) र धादिङ जिल्ला तिरपुरा गाउँपालिका वडा नं. ३ मुरचोकका ३७ बर्षिय किरण गजमेर रहेका छन् ।
उनीहरुसंग नुफिन ५० एम्पुल, डाईजेपाम ५० एम्पुल र फेनारगन ५० एम्पुल गरि जम्मा १ सय ५० एम्पुल लागुऔषध फेला परेको जिल्ला प्रहरी कार्यालय पाल्पाले जनाएको छ । कार र दुवै जना यूवालाई नियन्त्रणमा लिई जिल्ला प्रहरी कार्यालय ल्याई थप अनुसन्धान कार्य गरिरहेको जिल्ला प्रहरी कार्यालय पाल्पाका प्रहरी नायब उपरिक्षक वीरेन्द्र थापाले जानकारी दिनुभयो ।
